හිතුනාම ලියන්නට දිනපොතක් මටත් තියෙනවා
ඉඳහිටක පිටු අතර නුඹෙ නමත් තියෙනවා
මහ දුරක් නොකියාම නුඹ ගිහින් තියෙනවා
හිතුනාම තාම මට මහ හුඟක් ඇඬෙනවා...
ඇඬුනාම වෙනදටත් මගේ ඇස් කඳුලින් පිරෙනවා
දුටුවාම අඬනවා, නුඹෙ මූණ අඳුරින් පිරෙනවා
කේන්තියකින් පුංචි නුඹෙ වදන් පුපුරා හැලෙනවා
ආදරේ බව දැන දැනත් මං නෝක්කඩු කියනවා...
යද්දි මං කොළොම්තොට නුඹ බලන් ඉන්නවා
හැරී අත වැනුවාම නුඹත් අත වනනවා
මගෙ දිහා බලාගෙන හිතුවෙ නුඹ මොනවාද, අදත් මං හිතනවා
එක වරක් තව, නුඹෙ දෙපා නොවැන්ඳට, අදත් මං තැවෙනවා...
එකින් එක පිය තියා දිවි මගේ මං ඇදෙනවා
නුඹ ලඟින් උන්නනම් කියා විටෙකදි හිතෙනවා
හිතේ බර, මහන්සිය අදත් හිත පෙළනවා
සුමුදුවට හිස පිරිමදින නුඹෙ සුරත අහිමි බව දැනෙනවා...
වල් කපා, මල් වපුළ හිතක් මට තියෙනවා
ඒ හිතේ අදත් සුවඳ මල් පිපෙනවා
පිපෙන හැම මල ගණනෙ නුඹෙ සුවඳ දැනෙනවා
ජීවිතේ වටිනාම මල්දමක්, නුඹෙ නමට පිදෙනවා...
නුඹෙ වදන් නුඹෙ සිනා තවම මට ඇහෙනවා
අපි කරපු හැමදේම මට මතක තියෙනවා
හිත රිදෙන හැම විටක කඳුළු නෙත් අග පිරෙනවා
මේ දකින්නෙ හීනයක්දැයි හිත නිතර අහනවා...
